Bunuang de kutson, tuligsa
mo sa boksing. Matematika
ito ng puwersa, ilag ko
sa sunggab mo
para sa remote control.
Manonood ka ulit ng mga atake
sa kusina -- paano kalkulahin
ang kulo ng am, paano ilagan
ang tilamsik ng mantikang talim.
"Ba't hindi mo na lang tanghudan
ang buntalan ng mga agrabyado,
dungawin sa kalyehon?" Lampang bigwas
ang tanong. Tumatantiya. Hindi ako
nito mapatataob. Gamay ng tikom
na kamao ang iwas-hidwa. Kay tatag
ng mga kapitang lubid.

--by Ronaldo T. Santos